ಕಾವಡಿ ಹೊತ್ತು ಸುಬ್ರಹ್ಮಣ್ಯಸ್ವಾಮಿ ಆರಾಧನೆ: ತಮಿಳು ಸಂಪ್ರದಾಯ ಆಚರಣೆ

Sidlaghatta : ತಮಿಳುನಾಡು ಮೂಲದ ಕುಟುಂಬಗಳು ಶುಕ್ರವಾರ ನಗರದಲ್ಲಿ ಕಾವಡಿ ಹೊತ್ತು ಸುಬ್ರಹ್ಮಣ್ಯಸ್ವಾಮಿ ಆರಾಧನೆ ನಡೆಸಿದರು. ವಾದ್ಯಗೋಷ್ಠಿಯೊಂದಿಗೆ ನಗರದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ನಡೆಸಿದ ಭಕ್ತರು, ಬಳಿಕ ಕೋಟೆ ವೃತ್ತದ ಸೋಮೇಶ್ವರಸ್ವಾಮಿ ದೇವಾಲಯದ ಆವರಣದಲ್ಲಿರುವ ಸುಬ್ರಹ್ಮಣ್ಯಸ್ವಾಮಿ ದೇವಾಲಯಕ್ಕೆ ತೆರಳಿ ಅಭಿಷೇಕ ನೆರವೇರಿಸಿದರು.

ತಮಿಳುನಾಡಿನಿಂದ ಹಲವು ವರ್ಷಗಳ ಹಿಂದೆ ಶಿಡ್ಲಘಟ್ಟಕ್ಕೆ ಬಂದು ನೆಲೆಸಿರುವ ಕುಟುಂಬಗಳು ಈ ಸಂಪ್ರದಾಯವನ್ನು ಇಂದಿಗೂ ಮುಂದುವರಿಸಿಕೊಂಡು ಬರುತ್ತಿವೆ. ಭಕ್ತರು ತಮ್ಮ ಮನೆಗಳಲ್ಲಿ ಹಾಲನ್ನು ಸಂಗ್ರಹಿಸಿ, ಕಾವಡಿಯನ್ನು ಹೊತ್ತು ವಾದ್ಯಗೋಷ್ಠಿಯೊಂದಿಗೆ ನಗರದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ನಡೆಸಿದರು.

ಬಳಿಕ ಕೋಟೆ ವೃತ್ತದಲ್ಲಿರುವ ಸೋಮೇಶ್ವರಸ್ವಾಮಿ ದೇವಾಲಯದ ಆವರಣದ ಸುಬ್ರಹ್ಮಣ್ಯಸ್ವಾಮಿ ದೇವಾಲಯಕ್ಕೆ ತೆರಳಿ, ತಂದಿದ್ದ ಹಾಲಿನಿಂದ ದೇವರಿಗೆ ಅಭಿಷೇಕ ನೆರವೇರಿಸಿದರು. ಪೂಜೆ ಮತ್ತು ವಿಶೇಷ ಆರಾಧನೆಯೊಂದಿಗೆ ಹರಕೆ ಸಲ್ಲಿಸಿದರು.

ಕಾವಡಿ ಹೊರುವ ಸಂಪ್ರದಾಯ ಎಂದರೇನು?

ಕಾವಡಿ ಹೊರುವ ಸಂಪ್ರದಾಯವು ಮುಖ್ಯವಾಗಿ ಸುಬ್ರಹ್ಮಣ್ಯಸ್ವಾಮಿ (ಮುರುಗನ್) ಆರಾಧನೆಯ ಭಾಗವಾಗಿದೆ. ಹರಕೆ ಈಡೇರಿದ ಬಳಿಕ ಅಥವಾ ಹರಕೆ ತೀರಿಸುವ ಉದ್ದೇಶದಿಂದ ಭಕ್ತರು ಕಾವಡಿ ಹೊರುತ್ತಾರೆ. ಈ ಆಚರಣೆಗೆ ಮುನ್ನ ವ್ರತ ಪಾಲನೆ, ಸಾತ್ವಿಕ ಆಹಾರ ಸೇವನೆ ಹಾಗೂ ಆತ್ಮಸಂಯಮಕ್ಕೆ ಹೆಚ್ಚಿನ ಮಹತ್ವ ನೀಡಲಾಗುತ್ತದೆ.

ಪುರಾಣಗಳ ಪ್ರಕಾರ, ಅಗಸ್ತ್ಯ ಮುನಿಯ ಶಿಷ್ಯನಾದ ಇಡುಂಬನ್ ಎರಡು ಬೆಟ್ಟಗಳನ್ನು ಕಾವಡಿಯ ರೂಪದಲ್ಲಿ ಹೊತ್ತೊಯ್ದ ಘಟನೆಯೊಂದಿಗೆ ಈ ಸಂಪ್ರದಾಯ ಸಂಬಂಧ ಹೊಂದಿದೆ ಎಂಬ ನಂಬಿಕೆ ಇದೆ. ಬಳಿಕ ಸುಬ್ರಹ್ಮಣ್ಯಸ್ವಾಮಿಯ ಆರಾಧನೆಯಲ್ಲಿ ಕಾವಡಿ ಹೊರುವುದು ವಿಶೇಷ ಸೇವೆಯಾಗಿ ಬೆಳೆದಿದೆ.

ನಗರದಲ್ಲಿ ತಮಿಳು ಸಮುದಾಯದವರು ಈ ಆಚರಣೆಯನ್ನು ನಡೆಸುತ್ತಿದ್ದು, ಧಾರ್ಮಿಕ ಪರಂಪರೆಯನ್ನು ಮುಂದಿನ ಪೀಳಿಗೆಗೂ ಪರಿಚಯಿಸುವ ಪ್ರಯತ್ನ ಮಾಡುತ್ತಿದ್ದಾರೆ.

For Daily Updates WhatsApp ‘HI’ to 7406303366