ಹೈಟೆಕ್ ಮಾರುಕಟ್ಟೆ ಉದ್ಘಾಟನೆ ದಿನವೇ ರೇಷ್ಮೆ ರೀಲರುಗಳ ಕಪ್ಪುಪಟ್ಟಿ ಪ್ರತಿಭಟನೆ

Sidlaghatta, chikkaballapur : ರೇಷ್ಮೆ ರೀಲರುಗಳ ಬೇಡಿಕೆಗಳನ್ನು ಈಡೇರಿಸದ ರಾಜ್ಯ ಸರ್ಕಾರದ ನಿರ್ಲಕ್ಷ್ಯವನ್ನು ಖಂಡಿಸಿ, ನವೆಂಬರ್ 24ರಂದು ಹೈಟೆಕ್ ಗೂಡಿನ ಮಾರುಕಟ್ಟೆಯ ಉದ್ಘಾಟನೆಗೆ ಬರುವ ಮುಖ್ಯಮಂತ್ರಿ ಸಿದ್ದರಾಮಯ್ಯರ ಭೇಟಿಯ ವೇಳೆ ಕಪ್ಪು ಪಟ್ಟಿ ಧರಿಸಿ ಶಾಂತಿಯುತ ಪ್ರತಿಭಟನೆ ನಡೆಸುವುದಾಗಿ ರೇಷ್ಮೆ ನೂಲು ಬಿಚ್ಚಾಣಿಕೆದಾರರ ಕಲ್ಯಾಣ ಸಂಘದ ಅಧ್ಯಕ್ಷ ಅನ್ಸರ್ ಖಾನ್ ತಿಳಿಸಿದ್ದಾರೆ.

ನಗರದ ಪತ್ರಕರ್ತರ ಭವನದಲ್ಲಿ ಭಾನುವಾರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಅವರು ಮಾತನಾಡಿ, ಸರ್ಕಾರವು ಹಲವು ವರ್ಷಗಳಿಂದ ರೀಲರುಗಳ ಸಮಸ್ಯೆಗಳ ಬಗ್ಗೆ ಯಾವಾಗಲೂ ತಾರತಮ್ಯ ನೀತಿಯನ್ನೇ ಅನುಸರಿಸಿದೆ ಎಂದು ಆರೋಪಿಸಿದರು.

ಹಿಂದಿನ ಸರ್ಕಾರ ಬಡ್ಡಿರಹಿತ ₹3 ಲಕ್ಷ ವರ್ಕಿಂಗ್ ಕ್ಯಾಪಿಟಲ್ ನೀಡುವುದಾಗಿ ಭರವಸೆ ನೀಡಿದ್ದರೂ, ಇಂದಿನ ಸರ್ಕಾರ ಅದನ್ನು ₹5 ಲಕ್ಷಕ್ಕೆ ಹೆಚ್ಚಿಸುವುದಾಗಿ ಘೋಷಿಸಿದರೂ, ಯಾವುದೇ ಕ್ರಮ ಕೈಗೊಳ್ಳಲಾಗಿಲ್ಲ. ರೀಲರುಗಳು ಉತ್ಪಾದಿಸುವ ಕಚ್ಚಾ ರೇಷ್ಮೆಗೆ ಸರ್ಕಾರಿ ಖರೀದಿ ಮಾರುಕಟ್ಟೆ ಇಲ್ಲದಿರುವುದರಿಂದ ಅವರು ವ್ಯಾಪಾರಿಗಳ ದಯೆಗೆ ಬಿದ್ದಿದ್ದಾರೆ ಎಂದು ಹೇಳಿದರು.

ರೀಲರುಗಳಿಗೆ ಆಧುನಿಕ ಸೌಲಭ್ಯಗಳೊಂದಿಗೆ ರೀಲಿಂಗ್ ಪಾರ್ಕ್ ನಿರ್ಮಿಸುವ ಅಗತ್ಯವಿದೆ. ರೇಷ್ಮೆ ಕೈಗಾರಿಕೆಯಲ್ಲಿ ಕೆಲಸ ಮಾಡುವವರಲ್ಲಿ ಶೇಕಡಾ 80ರಷ್ಟು ಮಂದಿ ಉಸಿರಾಟದ ಸಮಸ್ಯೆ ಮತ್ತು ಆಸ್ತಮಾ ಸಮಸ್ಯೆಯಿಂದ ಬಳಲುತ್ತಿರುವ ಕಾರಣ, ವಿಶೇಷ ಟಿಬಿ–ಶ್ವಾಸಕೋಶ ಆಸ್ಪತ್ರೆ ಸ್ಥಾಪನೆ ಕೂಡ ಅಗತ್ಯವಿದೆ ಎಂದು ಒತ್ತಾಯಿಸಿದರು.

ಈಗಿರುವ ಗೂಡಿನ ಮಾರುಕಟ್ಟೆಗೆ ಗೂಡಿನ ಆವಕವೇ ಕಡಿಮೆಯಾಗಿರುವ ಸಂದರ್ಭದಲ್ಲಿ ‘ಹೈಟೆಕ್ ಮಾರುಕಟ್ಟೆ’ ನಿರ್ಮಾಣಕ್ಕೆ ಕೋಟ್ಯಾಂತರ ರೂಪಾಯಿ ವೆಚ್ಚ ಹಾಕುವುದರಿಂದ ರೈತರು ಹಾಗೂ ರೀಲರುಗಳಿಗೆ ಏನು ಪ್ರಯೋಜನ ಎಂಬುದನ್ನು ಸರ್ಕಾರ ಸ್ಪಷ್ಟಪಡಿಸಬೇಕು ಎಂದು ಪ್ರಶ್ನಿಸಿದರು.

ರೈತರಿಗೆ ಇ-ಹರಾಜು ಮೂಲಕ ಅದೇ ದಿನ ಹಣ ಲಭ್ಯವಾಗುವ ವ್ಯವಸ್ಥೆ ಇದ್ದರೂ, ರೀಲರುಗಳಿಗೆ ಅದೇ ರೀತಿಯ ಭದ್ರತೆ ಮತ್ತು ಬೆಂಬಲ ಒದಗಿಸುವ ಯಾವುದೇ ಸರ್ಕಾರಿ ವ್ಯವಸ್ಥೆ ಇಲ್ಲದಿರುವುದನ್ನು ಅವರು ಕಿಡಿಗೇಡಿಯಾಗಿ ಟೀಕಿಸಿದರು. “ಮಗ್ಗದ ದೊಡ್ಡ ವ್ಯಾಪಾರಿಗಳ ಶೋಷಣೆಯಿಂದ ರೀಲರುಗಳನ್ನು ರಕ್ಷಿಸುವ ವ್ಯವಸ್ಥೆ ಸರ್ಕಾರ ರೂಪಿಸಿದಾಗ ಮಾತ್ರ ಈ ಕೈಗಾರಿಕೆ ಉಳಿಯಲಿದೆ,” ಎಂದು ಹೇಳಿದರು.

ಸಭೆಯಲ್ಲಿ ರೈತರು ಮತ್ತು ರೀಲರುಗಳ ಸಂಘದ ಜಿ.ರೆಹಮಾನ್, ಕೆ.ಆನಂದ್ ಕುಮಾರ್, ಕೆ.ಸಾದಿಕ್ ಪಾಷ, ಕೆ.ಬಿ.ಮಂಜುನಾಥ್, ಮುನಿಕೃಷ್ಣಪ್ಪ, ಸಾದಿಕ್ ಪಾಷ, ಮುರ್ತುಜ್ ಪಾಷ ಸೇರಿ ಹಲವರು ಹಾಜರಿದ್ದರು.

For Daily Updates WhatsApp ‘HI’ to 7406303366