ಕನ್ನಡ ಚಲನಚಿತ್ರದ ಪ್ರಮುಖ ನಟರನ್ನು, ರಾಜಕೀಯ ನೇತಾರರನ್ನು ಶಿಡ್ಲಘಟ್ಟಕ್ಕೆ ಕರೆತರಲಿದ್ದು, ಕೌಟುಂಬಿಕ ಪರಿಸರದಲ್ಲಿ ಎಲ್ಲರೂ ಕುಳಿತು ಮೂರು ಗಂಟೆಗಳ ಕಾಲ ರಸಸಂಗೀತವನ್ನು ಆಸ್ವಾದಿಸುವ ‘ಶಿಡ್ಲಘಟ್ಟ ಸಿನಿಮಾ ಹಬ್ಬ’ವನ್ನು ಮೇ 1 ರಂದು ಆಯೋಜಿಸಿರುವುದಾಗಿ ಚಲನಚಿತ್ರ ನಿರ್ದೇಶಕ ಆರ್.ಚಂದ್ರು ತಿಳಿಸಿದರು.
ತಾಲ್ಲೂಕಿನ ಅಪ್ಪೇಗೌಡನಹಳ್ಳಿಯ ಬಳಿಯ ವಿಜಯಕುಮಾರ್ ಲೇಔಟ್ನಲ್ಲಿ ಭಾನುವಾರ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಅವರು ಮಾತನಾಡಿದರು. ಲಕ್ಷ್ಮಣ ಚಿತ್ರದ ಆಡಿಯೋ ಬಿಡುಗಡೆ ಶಿಡ್ಲಘಟ್ಟದಲ್ಲಿ ಅದ್ದೂರಿಯಾಗಿ ಮಾಡುವ ಉದ್ದೇಶದಿಂದ ಮೇ 1 ರಂದು ಸಂಜೆ 6 ಗಂಟೆಗೆ ಜ್ಯೂನಿಯರ್ ಕಾಲೇಜು ಮೈದಾನದಲ್ಲಿ ಕಾರ್ಯಕ್ರಮವನ್ನು ಆಯೋಜಿಸಿದ್ದೇವೆ. ಕನ್ನಡ ಚಲನಚಿತ್ರ ರಂಗದ ಪ್ರಮುಖ ನಟರಾದ ಅಂಬರೀಷ್, ರವಿಚಂದ್ರನ್ ಸೇರಿದಂತೆ ವಿವಿಧ ಖ್ಯಾತ ನಟರು ಆಗಮಿಸುವರು. ರಾಜಕೀಯ ನಾಯಕರೂ ಆಗಮಿಸುತ್ತಾರೆ. ಅರ್ಜುನ್ ಜನ್ಯ ಅವರ ರಸಸಂಜೆ ಕಾರ್ಯಕ್ರಮವನ್ನು ಏರ್ಪಡಿಸಲಾಗಿದೆ. ಸೃಜನ್ ಲೋಕೇಶ್ ಮತ್ತು ಅನುಪಮಾ ಭಟ್ ಕಾರ್ಯಕ್ರಮವನ್ನು ನಿರೂಪಿಸಲಿದ್ದಾರೆ.
ನಾನು ಹುಟ್ಟಿ ಬೆಳೆದ ತಾಲ್ಲೂಕಿನಲ್ಲಿ ಕನ್ನಡ ಚಲನಚಿತ್ರವೊಂದರ ಅದ್ದೂರಿ ಕಾರ್ಯಕ್ರಮವನ್ನು ನಡೆಸುವ ಮೂಲಕ ಒಂದೆಡೆ ತಾಲ್ಲೂಕಿನ ಜನರಿಗೆ ಕನ್ನಡ ಚಿತ್ರರಂಗದ ಪ್ರಮುಖರನ್ನು ಕರೆತಂದು ತೋರಿಸುತ್ತಾ, ಮತ್ತೊಂದೆಡೆ ಇಡೀ ಕನ್ನಡ ಚಲನಚಿತ್ರ ರಂಗದವರಿಗೆ ಶಿಡ್ಲಘಟ್ಟವನ್ನು ಪರಿಚಯಿಸುವ ಕೆಲಸವನ್ನು ಮಾಡುತ್ತಿದ್ದೇನೆ. ನಮ್ಮ ಊರಿನ ಭಾಷಾ ಸೊಗಡನ್ನು ನನ್ನ ಚಿತ್ರಗಳಲ್ಲಿ ಬಳಸಿದ್ದೇನೆ. ನಮ್ಮೂರು, ನಮ್ಮ ಜನರೊಂದಿಗೆ ನಾವು ಸಂಭ್ರಮವನ್ನು ಹಂಚಿಕೊಳ್ಳುವ ಆಸೆಯಿದೆ. ನಾನು ಹುಟ್ಟಿ, ಬೆಳೆದು, ಓಡಾಡಿದ, ಕಲಿತ, ಪ್ರೇರಣೆ ಪಡೆದ ಸ್ಥಳಕ್ಕೆ ನಮ್ಮ ಚಿತ್ರರಂಗದ ಪ್ರಮುಖರನ್ನು ಕರೆತರುವ ಅಭಿಲಾಷೆ ನನ್ನದು. ಈ ರೀತಿಯ ಕಾರ್ಯಕ್ರಮಗಳು ಬೆಂಗಳೂರು, ಹುಬ್ಬಳ್ಳಿ, ಚಿತ್ರದುರ್ಗದಂಥಹ ಪ್ರಮುಖ ನಗರಗಳಲ್ಲಿ ನಡೆಯುವುದು ರೂಢಿ. ಆದರೆ ಗಡಿ ಭಾಗದ ಜನರಲ್ಲೂ ಕನ್ನಡ ಪ್ರೀತಿಯಿದೆ ಎಂಬುದನ್ನು ಚಿತ್ರರಂಗದವರಿಗೆ ತೋರಿಸಿ, ನಮ್ಮೂರಿನ ಯುವಕರು ಹಾಗೂ ಮಕ್ಕಳಿಗೆ ಸಾಧಕರನ್ನು ಪರಿಚಯಿಸಿ ಅವರಿಗೂ ಚಿತ್ರರಂಗದಂಥಹ ಕ್ರಿಯಾಶೀಲ ಕ್ಷೇತ್ರದೆಡೆಗೆ ಆಸಕ್ತ ಉಂಟು ಮಾಡುವ ಉದ್ದೇಶವಿದೆ.
ಕುಟುಂಬ ಸಮೇತರಾಗಿ ತಾಲ್ಲೂಕು ಹಾಗೂ ಜಿಲ್ಲೆಯ ಜನರು ಸಾವಿರಾರು ಸಂಖ್ಯೆಯಲ್ಲಿ ಆಗಮಿಸಿ ಉತ್ತಮ ಕಾರ್ಯಕ್ರಮವನ್ನು ವೀಕ್ಷಿಸಲು ಸಕಲ ಏರ್ಪಾಡುಗಳನ್ನು ಮಾಡಲಾಗಿದೆ. ಮನರಂಜನೆಯೊಂದಿಗೆ ನಮ್ಮ ತಾಲ್ಲೂಕಿನ ಜನರನ್ನು ಕನ್ನಡ ಸಿನಿಮಾದತ್ತ ಆಕರ್ಷಿಸುವ, ಯುವಕರಿಗೆ ಹೊಸ ಪ್ರೇರಣೆ ನೀಡುವ ಕಾರ್ಯಕ್ರಮ ಇದಾಗಲಿದೆ ಎಂದರು.
ಮೇಲೂರು ವಿಜಯಕುಮಾರ್, ಮುನೀಂದ್ರ, ಚಂದ್ರು ಈ ಸಂದರ್ಭದಲ್ಲಿ ಹಾಜರಿದ್ದರು.
