ಉಪಬೆಳೆಯಾಗಿ ಕೋಕೋ ಎಷ್ಟು ಸೂಕ್ತ?

ಕೋಕೋ ಬೆಳೆ ವಾಣಿಜ್ಯ ಬೆಳೆಯಾಗಿ ಕಾಲಿರಿಸಿ ವಿಪರೀತ ವರ್ಷಗಳಾಗಿಲ್ಲ. ಆದರೆ ಈ ಅಲ್ಪಾವಧಿಯಲ್ಲಿ ಅದಕ್ಕೆ ಸಿಕ್ಕ ಪ್ರಚಾರ ನಿರೀಕ್ಷೆಗಿಂತ ಹೆಚ್ಚು. ಉಳಿದ ಕೃಷಿಕರಂತೆ ಬಹುವಾರ್ಷಿಕ ಬೆಳೆಗಳ ಮಧ್ಯೆ ಮಲೆನಾಡು, ಕರಾವಳಿಯ ಕೃಷಿಕರು ಅಡಿಕೆ, ತೆಂಗು ತೋಟದಲ್ಲಿ ಕೋಕೋವನ್ನು ಉಪಬೆಳೆಯಾಗಿ ಬೆಳೆಯುವ ಪ್ರಾಯೋಗಿಕ ಯತ್ನ ನಡೆಸಿದರು. ಯಶಸ್ವಿಯೂ ಆದರು. ಆದರೆ ಅದೇ ಅಂತಿಮ ಎನ್ನಿಸಲಿಲ್ಲ. ಸಮಸ್ಯೆಗಳು ಕಾಣಿಸಿಕೊಂಡವು. ಈ ಹಂತದಲ್ಲೇ ಉಪಬೆಳೆಯಾಗಿ ಕೋಕೋ ಸೂಕ್ತವೇ ಎಂಬ ಪ್ರಶ್ನೆ ಮೂಡಿದ್ದು.
ಉಪಬೆಳೆಯಾಗಿ ಕೋಕೋ ಸೂಕ್ತವಲ್ಲ ಎನ್ನುವಷ್ಟೇ ಮಂದಿ ಸೂಕ್ತ ಎನ್ನುವವರೂ ಇದ್ದಾರೆ. ಅವರದೇ ಆದ ವಾದವನ್ನೂ ಹೊಂದಿದ್ದಾರೆ. ಅದು ಹೀಗಿದೆ.
1. ಕೋಕೋ ವಿಶೇಷ ನಿರ್ವಹಣೆಯಿಲ್ಲದೆ ಬದುಕುವ, ಬೆಳೆ ಕೊಡುವ ಬೆಳೆ. ಅದಕ್ಕೆ ಪ್ರತ್ಯೇಕ ನೀರು, ಗೊಬ್ಬರಗಳ ಅಗತ್ಯ ಇಲ್ಲವೇ ಇಲ್ಲ.
2. ಗಿಡದ ತುಂಬಾ ಎಲೆಗಳನ್ನು ಹೊಂದಿ ಸೊಂಪಾಗಿ ಬೆಳೆಯುವುದರಿಂದ ತೋಟದಲ್ಲಿ ಕಳೆ ಕಡಿಮೆಯಾಗುತ್ತದೆ. ಹೆಚ್ಚುವರಿ ಕೊಂಬೆಗಳನ್ನು ಸವರುವುದರಿಂದ ತೋಟಕ್ಕೆ ಸೊಪ್ಪೂ ದೊರಕುತ್ತದೆ. ಉದುರಿದ ಎಲೆಗಳು ಕೂಡ ಇದೇ ರೀತಿಯ ಅನುಕೂಲವೊದಗಿಸುತ್ತವೆ.
3. ಯಾವುದೇ ರೀತಿಯ ರೋಗ, ಕಾಟಗಳಿಲ್ಲ. ಕೆಲವು ಕಡೆ ಕಾಟಗಳು ಇವೆಯಾದರೂ ನಗಣ್ಯ.
4. ತೋಟಕ್ಕೆ ನೆರಳು ಒದಗಿಸುತ್ತವೆ. ನೆರಳಿನಿಂದಾಗಿ ಎಲೆ ಅಡಿಕೆ ಸಸಿಗಳು ಬೆಳೆಯಲು ಸುಲಭವಾಗುತ್ತದೆ. ಅಡಿಕೆ ಸಸಿಗಳಿಗೆ ಪಶ್ಚಿಮ ದಿಕ್ಕಿನಿಂದ ಸೂರ್ಯನ ಬಿಸಿಲು ಬೀಳಬಾರದು. ಆ ರಕ್ಷಣೆ ಇದರಿಂದ ಸಿಗುತ್ತದೆ.
ಗಮನಿಸಬೇಕಾದುದೆಂದರೆ, ರಾಸಾಯನಿಕ ಆಧಾರಿತ ಮತ್ತು ಸಾವಯವ ಅನುಸರಿಸುವ ಕೃಷಿಕರಿಬ್ಬರೂ ಅಡಿಕೆ ತೋಟದಲ್ಲಿ ಕೋಕೋ ಬೆಳೆಯುವುದು ಮುಖ್ಯ ಬೆಳೆಗೆ ಮಾರಕವೆಂತಲೇ ವಾದಿಸುತ್ತಾರೆ. ಕೋಕೋ ಬೇಕೆನ್ನುವವರು ನೀಡಿದ ಪಟ್ಟಿಯನ್ನು ಈ ಮಂದಿ ಅಲ್ಲಗಳೆಯುತ್ತಾರೆ. ಅವರ ಸಮರ್ಥನೆ, ಸಂಶೋಧನೆಗಳ ಪ್ರವರ ಇಲ್ಲಿದೆ.
1. ಕೋಕೋ ಪ್ರತ್ಯೇಕ ನಿರ್ವಹಣೆ ಇಲ್ಲದೆ ಬೆಳೆಯಬಲ್ಲದು ನಿಜ. ಆದರೆ ಶೀಘ್ರ ಬೆಳವಣಿಗೆ ಲಕ್ಷಣಗಳನ್ನು ಹೊಂದಿರುವ ಗಿಡಗಳು ಹೆಚ್ಚು ಭೂಸಾರ ತಿನ್ನುವುದು ಖಚಿತ. ಈಗ ಹೇಳಿ ಇದೇ ಜೀವಲಕ್ಷಣದ ಕೋಕೋ ಮುಖ್ಯ ಬೆಳೆಗೆ ತೊಂದರೆ ನೀಡದೆ?
2. ಕೋಕೋ ಅತಿ ಹೆಚ್ಚು ಸೊಪ್ಪು, ನೆರಳು ನೀಡುತ್ತದೆ. ಆದರೆ ಈ ಅತಿ ಕೂಡ ತೋಟಕ್ಕೆ ಹಾನಿಕರ. ಇವು ವಿಶಾಲವಾಗಿ ವಿಸ್ತರಿಸುವುದರರಿಂದ ತೋಟಕ್ಕೆ ಗೊಳಲಾಗುತ್ತದೆ. (ಗೊಳಲು-ಗ್ರಾಮ್ಯಪದ-ಅಗತ್ಯಕ್ಕಿಂತ ಹೆಚ್ಚು ನೆರಳು ಉಂಟಾದಾಗಿನ ಪ್ರದೇಶ, ವಾತಾವರಣ) ಅಡಿಕೆ ಸಸಿಗಳು ಏಳಲಾರವು. ಇತರೆ ಉಪಬೆಳೆಗಳು (ಏಲಕ್ಕಿ, ಕಾಫಿ) ನಾಶವಾಗುತ್ತವೆ. ಅಲ್ಲದೆ ದರಲೆ ಕಾದಿಗೆ (ತೋಟದಲ್ಲಿ ನೀರು ಹರಿಯಲು ಮಾಡಿದ ಸಣ್ಣ ಕಾಲುವೆ)ಯಲ್ಲಿ ಸೇರಿ ನೀರಿನ ಹರಿವಿಗೆ ಅಡಚಣೆ ಮಾಡುತ್ತದೆ. ತೋಟದಲ್ಲಿ ನೀರು ನಿಲ್ಲುವುದರಿಂದ ಮಹಾಳಿ(ಕೊಳೆ)ಯಂಥ ರೋಗಗಳ ಸಾಧ್ಯತೆ ಹೆಚ್ಚು.
3. ಇತ್ತೀಚೆಗೆ ಇದಕ್ಕೆ ಕೊಳೆ ರೋಗದ ಬಾಧೆ ಕಾಣಿಸಿದೆ. ಕಾಯಿ ಬೆಳೆಯುವ ಮುನ್ನವೇ ರೋಗಾಣುಗಳಿಗೆ ತುತ್ತಾಗಿ ಕಪ್ಪಾಗಿ ಕೊಳೆಯುತ್ತದೆ, ಈ ಬಾರಿ ಅನೇಕರು ಈ ಸಮಸ್ಯೆಗೆ ಸಿಲುಕಿದ್ದಾರೆ.
4. ಮಂಗ, ಕಾಡುಬೆಕ್ಕು (ಕಬ್ಬೆಕ್ಕು)ಗಳು ಇದರ ರುಚಿ ಕಂಡಿವೆ. ಈ ಪ್ರಾಣಿಗಳ ಹಾವಳಿಯ ಅಂದಾಜು ಕಷ್ಟ. ಈ ಲೇಖಕರಂಥವರ ಅನುಭವವೇ ಸಾಕು.
5. ಇಂದು ಕೋಕೋ ಕೊಳ್ಳುತ್ತಿರುವವರು ಕ್ಯಾಂಪ್ಕೋದವರೊಂದೇ. ಒಂದು ವೇಳೆ ನಷ್ಟವಾಗಿಯೇ, ಇನ್ನಾವುದೋ ಬಹಿರಂಗಪಡಿಸಿದ ಕಾರಣಗಳಿಗಾಗಿ ಕೊಳ್ಳುವಿಕೆಯನ್ನು ನಿಲ್ಲಿಸಿದರೆ ಸಮಸ್ಯೆ ಗಗನ ಸದೃಶವಾಗುವುದು.
ಈ ಎರಡು ಮಾರ್ಗಗಳಲ್ಲಿ ಕೃಷಿಕನಿಗೆ ಯಾವುದು ಉತ್ತಮವೆಂದು ಆಲೋಚಿಸಿ. ಇವೆರಡೂ ಸ್ವೀಕಾರಾರ್ಹವೆನಿಸದಿದ್ದಲ್ಲಿ ಇನ್ನೊಂದು ಕೊನೆ ಮಾರ್ಗವಿದೆ. ಇದು ಅನಿವಾರ್ಯ ಅಲ್ಲ. ಆದರೆ ಎರಡನೇ ಮಾರ್ಗವನ್ನು ಒಪ್ಪಿಯೇ ಮುಂದಿಡಬೇಕಾದ ಹೆಜ್ಜೆ. ಕೃಷಿಕರು ಮನೆಯ ಹಿಂದಿನ ಗುಡ್ಡಗಳಲ್ಲಿ ಕೋಕೋವನ್ನು ಬೆಳೆಸಬಹುದು. ಅದು ಮುಖ್ಯ ಬೆಳೆಯೂ ಆದೀತು. ಇದೇನು ಹೊಸ ಯೋಚನೆಯಲ್ಲ. ಈ ಲೇಖಕ ಸಾಗರದಲ್ಲಿ ಹಿಂದೊಮ್ಮೆ ಕೋಕೋ ಬೀಜ ಮಾರಲು ಹೋದಾಗ ರೈತರೋರ್ವರು ಒಮ್ಮೆಗೆ 92 ಕೆ.ಜಿ. ಬೀಜವನ್ನು ಮಾರಲು ತಂದ ಉದಾಹರಣೆ ಇದೆ. ಇವರು ಕೋಕೋ ಬೆಳೆದದ್ದು ಬೋಳು ಗುಡ್ಡದಲ್ಲಿ.
ಈ ಪದ್ಧತಿಯ ಪ್ರತ್ಯಕ್ಷ, ಪರೋಕ್ಷ ಅನುಕೂಲಗಳು ಹೀಗಿವೆ.
1. ಪ್ರತ್ಯೇಕ ನೀರು, ನೆರಳು ಅಗತ್ಯವಿಲ್ಲ. ವರ್ಷಕ್ಕೊಮ್ಮೆ ಹಟ್ಟಿಗೊಬ್ಬರ, ಹೆಚ್ಚುವರಿ ಕೊಂಬೆಗಳ ಕಟಿಂಗ್ ಸಾಕು, ಇದಕ್ಕೂ ಹೆಚ್ಚಿನ ನಿರ್ವಹಣೆ ಅನಗತ್ಯ.
2. ತೋಟದಲ್ಲಿಗಿಂತ ರೋಗಗಳು ಕಡಿಮೆ.
3. ಬೆಟ್ಟಗಳ ಕೃತಕ ಸೃಷ್ಟಿಯಿಂದ ಮಳೆಯಿಂದುಂಟಾಗುವ ಭೂ ಕೊರೆತ ತಪ್ಪುತ್ತದೆ.
4. ‘ಇಂದು ಹಳ್ಳಿಗರು ಮನೆ ಸುತ್ತ ಏನೂ ಬೆಳೆಯುವುದಿಲ್ಲ. ಮಂಗ ವಂಶಸ್ಥರ ಕಾಟ. ಆದರೆ ಗುಡ್ಡಗಳಲ್ಲಿ ಕೋಕೋ ಬೆಳೆಯುವುದರಿಂದ ಮಂಗಗಳು ಅಲ್ಲೇ ತಮ್ಮ ಆಹಾರ ಮೂಲ ಕಂಡುಕೊಳ್ಳುತ್ತದೆ. ಇದರಿಂದ ಮನೆ ಸುತ್ತ ಮಂಗಗಳ ಕಾಟ ತಪ್ಪುತ್ತೋ ಇಲ್ಲವೋ ಆದರೆ ಖಂಡಿತಾ ಕಡಿಮೆಯಾಗುತ್ತದೆ. ಇದು ಬಹುದೊಡ್ಡ ಪರೋಕ್ಷ ಅನುಕೂಲ.
5. ಪ್ರತ್ಯೇಕವಾಗಿ ಬೆಳೆಯುವುದರಿಂದ ತೋಟದ ಅಥವಾ ವ್ಯಾವಹಾರಿಕ ನಷ್ಟ ಅನುಭವಿಸುವ ಸಮಸ್ಯೆಗಳಿಲ್ಲ.
ಈ ಎಲ್ಲ ವಿವರಗಳು ಅನೇಕ ಕೃಷಿಕರ ಅನುಭವ ಆಧಾರಿತವಾದದ್ದು. ಕೊನೆ ಪಕ್ಷ ಗುಡ್ಡ, ಖುಷ್ಕಿಯಲ್ಲಿ ಬೆಳೆಯಲು ಯಾರ ತಕರಾರೂ ಇಲ್ಲ. ಹಾಗಿದ್ದರೆ ಕೋಕೋ ಬೆಳೆಯುವ ವಿಧಾನ ಹೇಗೆ? ಅದನ್ನು ವಿವರಿಸುವುದಾದರೆ, ಸಾಮಾನ್ಯವಾಗಿ ಎಲ್ಲಾ ವಿಧದ ಮಣ್ಣಿನಲ್ಲೂ ಕೋಕೋ ಬೆಳೆಯುತ್ತದಾದರೂ ಮರಳು ಮಿಶ್ರಿತ ಗೋಡು, ಕೆಂಪು ಗೋಡು ಮಣ್ಣಿನಲ್ಲಿ ಚೆನ್ನಾಗಿ ಬೆಳೆಯುತ್ತದೆ. ಗಟ್ಟಿ ನೆಲ ಮತ್ತು ಜೌಗು ಭೂಮಿ ಯೋಗ್ಯವಲ್ಲ. ಗಿಡಗಳು ಸುಲಭ ಲಭ್ಯ. ಕಸಿ ಗಿಡಗಳ ಅಗತ್ಯವೇ ಇಲ್ಲ. ಮಳೆಗಾಲದಲ್ಲಿ ಈ ಗಿಡದ ಬುಡದಲ್ಲಿ ಎದ್ದ ಸಸಿಗಳನ್ನೇ ನೇರವಾಗಿ ತಂದು ನಾಟಿ ಮಾಡಬಹುದು. ನೆಟ್ಟ 2 ವರ್ಷಕ್ಕೆ ಹೂ ಬಿಡುವ ಕೋಕೋ ಮೂರನೇ ವರ್ಷದಿಂದಲೇ ಪೂರ್ಣ ಪ್ರಮಾಣದ ಫಸಲು ಕೊಡುತ್ತವೆ. ಸ್ವಾರಸ್ಯವೆಂದರೆ ಕಸಿ ಗಿಡಗಳಲ್ಲೂ ಇದೇ ಕತೆ! ಹೈಬ್ರಿಡ್ ತಳಿಗಳನ್ನು ಹಲವರು ಬೆಳೆಸುತ್ತಿದ್ದು, ಇದರಲ್ಲಿ ಕಾಯಿ ದೊಡ್ಡದಾಗಿರುವುದಲ್ಲದೆ 250 ರಿಂದ 400 ಗ್ರಾಂವರೆಗೂ ಬೀಜ ತೂಗುತ್ತದೆ. ಸಾಮಾನ್ಯ ತಳಿಗಳಲ್ಲಿ ಬೀಜ 200 ಗ್ರಾಂಗಳ ಆಜುಬಾಜು ತೂಗುತ್ತದೆ. ಪ್ರಸ್ತುತ ತೋಟಗಾರಿಕೆ ಇಲಾಖೆಯಲ್ಲೂ ಪ್ರತಿ ಗಿಡಕ್ಕೆ 2 ರೂ.ನಂತೆ ಸಿಗುತ್ತಿದೆ. ಒಂದು ಎಕರೆಗೆ 436 ಗಿಡಗಳನ್ನು ನೆಡಬಹುದು. 3ಮೀ. ಅಂತರದಲ್ಲಿ 90 ಸೆಂ.ಮಿ. ಘನಾಕೃತಿಯ ಗುಣಿಗಳನ್ನು ತೋಡಬೇಕು. 4ರಿಂದ 6 ತಿಂಗಳ ಸಸಿ ನಾಟಿ ಮಾಡಲು ಸೂಕ್ತ. ನಂತರದ ದಿನಗಳಲ್ಲಿ ಗಿಡ ಚೆನ್ನಾಗಿ ಬೆಳೆಯಲು ಕೆಲವು ಹೊರಚಾಚಿದ ಕೊಂಬೆಗಳನ್ನು ಕತ್ತರಿಸುತ್ತಿರಬೇಕು. ಬಹುಪಾಲು ಗಿಡಗಳು 2 ವರ್ಷಗಳ ನಂತರ ಹೂ ಬಿಡುತ್ತದೆ. 8 ವರ್ಷಗಳ ನಂತರ ಪೂರ್ಣಪ್ರಮಾಣದ ಇಳುವರಿ ನೀಡುತ್ತದೆ. ಕಾಯಿ ಹಣ್ಣಾಗುವಾಗ ನಸುಹಳದಿ ಬಣ್ಣದ್ದಾಗಿರುತ್ತದೆ. ಇದರ ಬೀಜಗಳನ್ನು ಮಾತ್ರ ಖರೀದಿಸಲಾಗುವುದರಿಂದ ಉಳಿದ ಸಿಪ್ಪೆಯನ್ನು ಸ್ವಲ್ಪ ಪ್ರಮಾಣ ಜಾನುವಾರುಗಳಿಗೆ ಮತ್ತು ಹೆಚ್ಚಾದುದನ್ನು ಗೊಬ್ಬರ, ಗೋ ಗ್ಯಾಸ್ ಸ್ಥಾವರಕ್ಕೆ ಉಣಿಸಬಹುದು.
ಯಾವುದೋ ಹೊಸ ಬೆಳೆಯ ಗಿಡವೊಂದಕ್ಕೆ 15-20 ರೂ. ಕೊಟ್ಟು ತ್ರಿಶಂಕು ಸ್ವರ್ಗ ಅನುಭವಿಸುವುದಕ್ಕಿಂತ ಕೃಷಿಕನಿಗೆ ‘ಕೈ ತುತ್ತು’ ಕೊಡುವ ಕೋಕೋ ಆತ್ಮೀಯವಾಗಬೇಕು.
– ಮಾ.ವೆಂ.ಸ.ಪ್ರಸಾದ್