ಆಪ್ತಸಲಹೆ-ಏನು, ಏಕೆ, ಹೇಗೆ?

ಇತ್ತೀಚೆಗೆ ಆಪ್ತಸಲಹೆ ಮತ್ತು ಮನೋಚಿಕಿತ್ಸೆ ಎನ್ನುವ ಶಬ್ದಗಳು ಹೆಚ್ಚು ಪ್ರಚಲಿತವಾಗುತ್ತಿವೆ. ಹಾಗಿದ್ದರೂ ಜನಸಾಮಾನ್ಯರಲ್ಲಿ ಇವು ನಡೆಯುವ ರೀತಿ ಮತ್ತು ಇವುಗಳಿಂದ ಸಿಗಬಹುದಾದ ಪರಿಣಾಮಗಳ ಬಗೆಗೆ ಹೆಚ್ಚಿನ ತಿಳುವಳಿಕೆಯಿಲ್ಲ. ಇದರಿಂದ ಸಾಕಷ್ಟು ಜನರಿಗೆ ಅಗತ್ಯವಿದ್ದರೂ ಇವುಗಳಿಂದ ಪ್ರಯೋಜನ ಪಡೆಯಲಾಗುತ್ತಿಲ್ಲ.
ಆಪ್ತಸಲಹೆ ಎಂದರೇನು?
ಸರಳವಾಗಿ ಹೇಳುವುದಾದರೆ ಮಾನಸಿಕ ಸಮಸ್ಯೆ ಇರುವ ವ್ಯಕ್ತಿಗೆ (ಮಾಸವ್ಯ) ತನ್ನ ಸಮಸ್ಯೆಗಳಿಗೆ ಅವನದೇ ಆದ ರೀತಿಯಲ್ಲಿ ಪರಿಹಾರವನ್ನು ಹುಡುಕಿಕೊಳ್ಳಲು ಸಹಾಯ ಮಾಡುವುದೇ ಆಪ್ತಸಲಹೆ. ಜನಸಾಮಾನ್ಯರು ತಿಳಿದಿರುವಂತೆ ಆಪ್ತಸಲಹೆಗಾರರು ಉಪದೇಶ ಮಾಡುವುದಿಲ್ಲ, ಬುದ್ಧಿವಾದ ಹೇಳುವುದಿಲ್ಲ ಅಥವಾ ತಮಗೆ ಸರಿಯೆನಿಸುವ ಪರಿಹಾರವನ್ನು ಒಪ್ಪಿಕೊಳ್ಳಲು ಒತ್ತಾಯಿಸುವುದಿಲ್ಲ. ಇದನ್ನೆಲ್ಲಾ ಮನೆಯ ಹಿರಿಯರು, ಸ್ನೇಹಿತರು ಅಥವಾ ಧಾರ್ಮಿಕ ಮುಖಂಡರು ಮಾಡುತ್ತಾರೆ. ತಮ್ಮ ಅಭಿಪ್ರಾಯವನ್ನು ಇನ್ನೊಬ್ಬರ ಮೇಲೆ ಹೇರುವವನು ತಜ್ಞ ಆಪ್ತ ಸಲಹೆಕಾರನಲ್ಲ ಎಂದು ತಿಳಿಯಬಹುದು.
ಅಂದರೆ ಆಪ್ತಸಲಹೆಯ ನಿಯಮಗಳ ಪ್ರಕಾರ ರೋಗಿ ದಡ್ಡನೂ ಅಲ್ಲ, ಆಪ್ತಸಲಹೆಗಾರ ಮಹಾಜ್ಞಾನಿಯೂ ಅಲ್ಲ. ಮಾಸವ್ಯ ತನ್ನ ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳಲು ಸಂಪೂರ್ಣ ಶಕ್ತಿಯುಳ್ಳವನಾಗಿರುತ್ತಾನೆ. ಆದರೆ ಸಮಸ್ಯೆಗಳ ಭಾರದಲ್ಲಿ ನಲುಗಿದ ಅವನಿಗೆ ಆ ಸಮಯದಲ್ಲಿ ಮಾನಸಿಕ ಗೊಂದಲವಿರುತ್ತದೆ. ಆಪ್ತಸಲಹೆಗಾರ ಅವನ ಗೊಂದಲಗಳನ್ನು ಪರಿಹರಿಸಿ ಚಿಂತನೆಗೆ ಸರಿಯಾದ ದಾರಿಯನ್ನು ತೋರಿಸುತ್ತಾರೆ. ಮಾಸವ್ಯನಿಗೆ ಅವನ ಶಕ್ತಿಯ ಅರಿವು ಮೂಡಿಸಿ ಅವನನ್ನು ಕ್ರಿಯೆಗೆ ಹಚ್ಚುತ್ತಾರೆ. ಮುಂದೆ ಮಾಸವ್ಯ ತನ್ನ ಸಮಸ್ಯೆಗಳಿಗೆ ತಾನೇ ಸಮಾಧಾನ ಕಂಡುಕೊಳ್ಳುತ್ತಾನೆ.
ಕೌಟುಂಬಿಕ ಅಥವಾ ಪತಿಪತ್ನಿಯರಿಗೆ ನೀಡುವ ಆಪ್ತಸಲಹೆಯಲ್ಲಿ ಸಂಬಂಧಗಳ ಸಿಕ್ಕನ್ನು ಬಿಡಿಸಿ, ಅದನ್ನು ಉಳಿಸಿ ಬೆಳೆಸಿಕೊಳ್ಳುವ ಅರಿವು ಮತ್ತು ತರಬೇತಿಯನ್ನು ನೀಡಲಾಗುತ್ತದೆ. ಇಲ್ಲೂ ಕೂಡ ಪತಿಪತ್ನಿಯರಿಬ್ಬರಿಗೂ ಒಪ್ಪಿಗೆಯಾಗುವಂತಹ ಪರಿಹಾರಗಳನ್ನು ಕಂಡುಕೊಳ್ಳಲು ಆಪ್ತಸಲಹೆಗಾರರು ಸಹಾಯಮಾಡುತ್ತಾನೆಯೇ ಹೊರತು, ತನಗೆ ಸರಿಯೆನಿಸಿದ ಪರಿಹಾರವನ್ನು ಒತ್ತಾಯದಿಂದ ಹೇರುವುದಿಲ್ಲ.
ಮನಶ್ಯಾಸ್ತ್ರ ಮತ್ತು ಮನೋವೈದ್ಯಕೀಯಶಾಸ್ತ್ರಗಳು ಬೇರೆ ಬೇರೆಯೇ?
ಕ್ಲಿನಿಕಲ್ ಸೈಕಾಲಜಿ ಮತ್ತು ಸೈಕಿಯಾಟ್ರಿ ಎರಡೂ ಮಾನಸಿಕ ಖಾಹಿಲೆಗಳಿಗೆ ಚಿಕಿತ್ಸೆ ನೀಡುವ ವಿಜ್ಞಾನಗಳಾದರೂ ಇವುಗಳಲ್ಲಿ ತುಂಬಾ ವ್ಯತ್ಯಾಸಗಳಿವೆ. ಮನೋವೈದ್ಯರುಗಳು ದೈಹಿಕ ನ್ಯೂನತೆಯಿಂದಾದ ಮತ್ತು ಮೆದುಳಿನಲ್ಲಿ ರಾಸಯನಿಕಗಳ ಸೃಜನೆಯ ವ್ಯತ್ಯಯದಿಂದಾದ ತೀವ್ರ ಮಾನಸಿಕ ರೋಗಗಳಿಗೆ ಔಷಧಿಗಳ ಮೂಲಕ ಚಿಕಿತ್ಸೆ ನೀಡುತ್ತಾರೆ. ಕೌನ್ಸೆಲ್ಲರ್‍ಗಳು ಮತ್ತು ಮನೋಚಿಕಿತ್ಸಕರು ಹಿಂಸಾ ಪ್ರವೃತ್ತಿಗಿಳಿಯದೆ, ತನ್ನ ಬಗ್ಗೆ ಮತ್ತು ಸುತ್ತಲಿನ ಪ್ರಪಂಚದ ಬಗೆಗೆ ಪೂರ್ಣ ಅರಿವಿರುವವರ ಮಾನಸಿಕ ತೊಂದರೆಗಳಿಗೆ ಔಷಧಿಗಳನ್ನು ನೀಡದೆ ಆಪ್ತಸಲಹೆಯ ಮೂಲಕ ಪರಿಹಾರ ಸೂಚಿಸುತ್ತಾರೆ. ಕೆಲವು ಸಾಮಾನ್ಯವೆನ್ನಿಸುವ ಮಾನಸಿಕ ತೊಂದರೆಗಳಿಗೆ ಯಾರಲ್ಲಿಗೆ ಹೋಗಬೇಕೆಂಬ ಗೊಂದಲವಿದ್ದರೆ ಕುಟುಂಬ ವೈದ್ಯರ ಸಲಹೆ ಪಡೆಯಬಹುದು.
ಆಪ್ತಸಲಹೆ ಮತ್ತು ಮನೋಚಿಕಿತ್ಸೆಗಳಲ್ಲಿ ವ್ಯತ್ಯಾಸವಿಯೇ?
ಜನಸಾಮಾನ್ಯರ ಮಟ್ಟದಲ್ಲಿ ಇವೆರೆಡೂ ಒಂದೇ ಆದರೂ ಕೆಲವು ತಾಂತ್ರಿಕ ವ್ಯತ್ಯಾಸಗಳಿವೆ. ಆಪ್ತಸಲಹೆಯನ್ನು ಸಾಮಾನ್ಯ ತರಬೇತಿಹೊಂದಿದವರು ತೀವ್ರವಲ್ಲದ ಮಾನಸಿಕ ಅಥವಾ ಕೌಟುಂಬಿಕ ಸಮಸ್ಯೆಗಳಿಗಾಗಿ ನೀಡುತ್ತಾರೆ. ಮನೋಚಿಕಿತ್ಸಕರು ತಕ್ಕ ವಿದ್ಯಾರ್ಹತೆ ಮತ್ತು ತರಬೇತಿ ಪಡೆದಿದ್ದು, ಮಾನಸಿಕ ಸಮಸ್ಯೆಗಳ ಆಳಕ್ಕೆ ಹೊಗಿ ವಿವಿಧ ರೀತಿಯ ಚಿಕಿತ್ಸೆ ಮತ್ತು ತರಬೇತಿ ನೀಡಬಲ್ಲವರಾಗಿರುತ್ತಾರೆ. ಸರಳವಾಗಿ ಹೇಳುವುದಾದರೆ ಮನೋಚಿಕಿತ್ಸೆ ಆಪ್ತಸಲಹೆಗಿಂತ ಹೆಚ್ಚು ತಾಂತ್ರಿಕವಾದದ್ದು ಮತ್ತು ಪರಿಣಾಮಕಾರಿಯಾದದ್ದು. ಸಾಮಾನ್ಯವಾಗಿ ಆಪ್ತಸಲಹೆ ನೀಡುವವರು ಮನೋಚಿಕಿತ್ಸೆಯಲ್ಲೂ ತರಬೇತಿ ಹೊಂದಿರುತ್ತಾರೆ ಹಾಗಾಗಿ ಅಗತ್ಯವೆನ್ನಿಸಿದಾಗ ಇವನು ಆಪ್ತಸಲಹೆಗಾರನೋ ಅಥವಾ ಮನೋಚಿಕಿತ್ಸಕನೋ ಎಂಬ ಗೊಂದಲಕ್ಕೆ ಬೀಳದೆ ಭೇಟಿಮಾಡಬಹುದು. ಈ ಲೇಖನದಲ್ಲಿ ಮನೋಚಿಕಿತ್ಸೆ ಎಂಬ ಶಬ್ದವನ್ನು ಹೆಚ್ಚು ಬಳಸಲಾಗಿಲ್ಲ.
ಹೇಗೆ ನಡೆಯುತ್ತದೆ?
ಮಾನಸಿಕ ಸಮಸ್ಯೆ ಇರುವ ವ್ಯಕ್ತಿ ಆಪ್ತಸಲಹೆಗಾಗಿ ಬಂದಾಗ ಕೌನ್ಸೆಲ್ಲರ್‍ಗಳು ಮೊದಲು ಅವನೊಡನೆ ಸಹೃದಯತೆಯಿಂದ ವರ್ತಿಸಿ ಒಂದು ಆತ್ಮೀಯ ವಾತವರಣ ಕಲ್ಪಿಸುತ್ತಾರೆ. ಇದರಿಂದ ವ್ಯಕ್ತಿಗೆ ತನ್ನ ಮನದಾಳವನ್ನು ಬಿಚ್ಚಿಡಲು ಸಾಧ್ಯವಾಗುತ್ತದೆ. ನಂತರ ಇಬ್ಬರೂ ಸೇರಿ ಮಾನಸಿಕ ಗೊಂದಲಗಳ ಸಿಕ್ಕು ಬಿಡಿಸುತ್ತಾ, ಪರಿಹಾರ ಹುಡುಕುತ್ತಾ ಹೋಗುತ್ತಾರೆ, ಇಲ್ಲಿ ಸಮಸ್ಯೆ ಇರುವ ವ್ಯಕ್ತಿ ನೆನಪಿಡಬೇಕಾದ ಮುಖ್ಯ ವಿಚಾರವೆಂದರೆ, ದೈಹಿಕ ಕಾಯಿಲೆಯನ್ನು ರೋಗಿಗೆ ಅರಿವಿಲ್ಲದೆ, ಅವನ ಸಹಕಾರವಿಲ್ಲದೆ [ಒಮ್ಮೊಮ್ಮೆ ವಿರೊಧವಿದ್ದರೂ] ಔಷಧಗಳ ಮೂಲಕ ಗುಣಡಿಸುವಂತೆ, ಮಾನಸಿಕ ತೊಂದರೆಗಳನ್ನು ಪರಿಹರಿಸಲಾಗುವುದಿಲ್ಲ. ವ್ಯಕ್ತಿಗೆ ತನ್ನ ಗೊಂದಲಗಳಿಂದ ಹೊರಬರಬೇಕೆನ್ನುವ ಇಚ್ಚೆ ಇರಬೇಕು; ಕೌನ್ಸೆಲ್ಲರ್ ಸೂಚಿಸಿದ ಪರಿಹಾರಗಳನ್ನು ಅಳವಡಿಸಿಕೊಂಡು ಅದರ ಫಲಿತಾಂಶಗಳ ಬಗ್ಗೆ ವರದಿ ನೀಡುತ್ತಾ ಸಹಕರಿಸಬೇಕು. ಕೌನ್ಸೆಲ್ಲರ್‍ನ ಹತ್ತಿರ ಮಂತ್ರದಂಡವೇನೂ ಇರುವುದಿಲ್ಲ, ಆತ ಮಾನಸಿಕ ಸಮಸ್ಯೆಗಳ ಆಳಕ್ಕೆ ಹೋಗಿ, ಅವುಗಳ ಸಿಕ್ಕು ಬಿಡಿಸಿ ವ್ಯಕ್ತಿಗೆ ಅದರ ಬಗ್ಗೆ ಅರಿವು ಮೂಡಿಸಬಲ್ಲ; ಪರಿಹಾರದ ಹಲವಾರು ಮಾರ್ಗಗಳನ್ನು ಅವುಗಳ ಒಳಿತು ಕೆಡಕುಗಳೊಂದಿಗೆ ವ್ಯಕ್ತಿಯ ಮುಂದಿಡಬಲ್ಲ; ನಂತರದ ಕ್ರಿಯೆಗಳ, ಅಂದರೆ ತನಗೆ ಸರಿಹೊಂದುವ ಮಾರ್ಗದ ಆಯ್ಕೆ ಮತ್ತು ಅದನ್ನು ಅಳವಡಿಸಿಕೊಳ್ಳುವ, ಬದಲಾಯಿಸಿಕೊಳ್ಳುವ ಸಂಪೂರ್ಣ ಜವಾವ್ದಾರಿ, ಸಮಸ್ಯೆ ಇರುವ ವ್ಯಕ್ತಿಯ ಮೇಲಿರುತ್ತದೆ. ಅವನ ಪ್ರಯತ್ನಕ್ಕೆ, ಎಲ್ಲಾ ಹಂತಗಳಲ್ಲೂ ಕೌನ್ಸೆಲ್ಲರ್‍ನ ಸಂಪುರ್ಣ ಸಲಹೆ ಸಹಕಾರಗಳಿದ್ದರೂ, ಪ್ರಾಥಮಿಕ ಜವಾಬ್ದಾರಿ ವ್ಯಕ್ತಿಯ ಮೇಲಿರುತ್ತದೆ.
ಅಂದರೆ ಇದು ನಿರುಪಯುಕ್ತವೇ?
ಹಾಗಂತ ಆಪ್ತಸಲಹೆ ಅಂದರೆ ಹೇಳಿದ್ದನ್ನು ಸಮಾಧಾನದಿಂದ ಕೇಳುವುದು, ಒಂದಿಷ್ಟು ಸಹಾನುಭೂತಿ ವ್ಯಕ್ತಪಡಿಸುವುದು, ಸೂಕ್ತಸಲಹೆ ನೀಡಿ ಪೀಸು ಕೀಳುವುದು- ಇಷ್ಟೇ ಅಂತ ಸಿನಿಕರಾಗಬೇಕಿಲ್ಲ! ಬರಿಯ ಉಪದೇಶದಿಂದ ಬದಲಾವಣೆ ಅಸಾಧ್ಯ. ಉಪದೇಶ, ಟೀಕೆ ಮಾಡದೇ ಇರುವುದನ್ನು. ಕೌನ್ಸೆಲ್ಲರ್‍ಗಳಿಗೆ ಕಲಿಸಲಾಗುತ್ತದೆ. ಕೌನ್ಸೆಲ್ಲರ್‍ಗಳು ಸಮಸ್ಯೆಗಳನ್ನು ಸಲಹೆಗಾಗಿ ಬಂದವನ ದೃಷ್ಟಿಯಿಂದ ನೊಡಿ, ಅವನಿಗೆ ಮಾನಸಿಕ ಗೊಂದಲಗಳ ಅರಿವು ಮೂಡಿಸಿದ ನಂತರ ಸೂಕ್ತ ಸಲಹೆ ನೀಡಿದರೆ ಪರಿಣಾಮಕಾರಿಯಾಗುತ್ತದೆ. ವೃತ್ತಿಯ ಬಗ್ಗೆ ಕಾಳಜಿ, ಅಗತ್ಯ ವಿದ್ಯಾರ್ಹತೆ, ತರಬೇತಿ ಮತ್ತು ಪ್ರಮುಖವಾಗಿ ಸಾಕಷ್ಟು ಅನುಭವವಿರುವ ಕೌನ್ಸೆಲ್ಲರ್‍ಗಳು ಶೀಘ್ರವಾಗಿ ಮತ್ತು ಪರಿಣಾಮಕಾರಿಯಾಗಿ ಫಲಿತಾಂಶ ನೀಡಬಲ್ಲರು.
ಆಪ್ತಸಲಹೆ ಬಗ್ಗೆ ಕೀಳರಿಮೆ
ಮಾನಸಿಕ ರೋಗಗಳ ಬಗ್ಗೆ ಜನಸಾಮಾನ್ಯರಲ್ಲಿ ಅಜ್ಞಾನ ಮತ್ತು ಭಯವಿರುವುದರಿಂದ ಈಗಲೂ ತಜ್ಞರ ಬದಲಾಗಿ ಮಾಂತ್ರಿಕರು ಮತ್ತು ಬಾಬಾಗಳಿಂದ ಪರಿಹಾರ ಹುಡುಕುತ್ತಾರೆ. ಇದರ ಬಗ್ಗೆ ಅರಿವಿರುವವರೂ, ಕೌನ್ಸೆಲ್ಲರ್‍ಗಳ ಅಥವಾ ಮನೋವೈದ್ಯರ ಬಳಿಗೆ ಚಿಕಿತ್ಸೆಗೆ ಹೋಗುವುದು ಸಾಮಾಜಿಕ ಕಳಂಕ ಎಂದುಕೊಂಡು ಹಿಂಜರಿಯುತ್ತಾರೆ. ಮೆಟ್ರೋಪಾಲಿಟನ್ ನಗರಗಳಲ್ಲಿ ಪರಿಸ್ಥಿತಿ ತ್ವರಿತವಾಗಿ ಬದಲಾಗುತ್ತಿದ್ದರೂ, ಉಳಿದಂತೆ ನಿಧಾನವಾಗಿ ಅರಿವು ಮೂಡುತ್ತಿದೆ. ನಾವೆಲ್ಲಾ ನೆನಪಿಡಬೇಕಾದ್ದು- ಸಮಸ್ಯೆ ಯಾವುದೇ ವಿಷಯದ್ದೇ ಇರಲಿ ಅದನ್ನು ಪರಿಹರಿಸುವ ಮೊದಲ ಹಂತ ಇರುವ ಸಮಸ್ಯೆಯನ್ನು ಇರುವಂತೆ ಒಪ್ಪಿಕೊಳ್ಳುವುದು. ವಸ್ತುಸ್ಥಿತಿಯನ್ನು ಅಲ್ಲಗಳೆಯುತ್ತಾ ಹೋದರೆ ಹತ್ತಿಕ್ಕಲ್ಪಟ್ಟ ಭಾವನೆಗಳು ಸ್ಪೋಟಗೊಳ್ಳುವ ಅಪಾಯವಿರುತ್ತದೆ. ಆಗ ಬೇಕಾಗುವ ಚಿಕಿತ್ಸೆಗೆ ಹಣ ಮತ್ತು ಸಮಯ ಹೆಚ್ಚಾಗಬಹುದು. ಹಾಗಾಗಿ ಯಾವುದೇ ಮಾನಸಿಕ ಸಮಸ್ಯೆ ಎದುರಾದಾಗ ಮೊದಲು ಆಪ್ತರಲ್ಲಿ ಹಂಚಿಕೊಳ್ಳಬೇಕು. ಸಮಸ್ಯೆಯ ಬಾದನೆ ಮುಂದುವರೆದರೆ ಕುಟುಂಬ ವೈದ್ಯರ ಸಲಹೆ ಪಡೆಯುವಲ್ಲಿ ವಿಳಂಬ ಮಾಡಬಾರದು.
ಆಪ್ತಸಲಹೆ ಯಾವಾಗ?
ನಮಗೆಲ್ಲರಿಗೂ ಹಲವಾರು ರೀತಿಯ ಮಾನಸಿಕ ಕಿರಿಕಿರಿಗಳಿರುತ್ತವೆ. ಇವುಗಳಿಗೆ ಕಾರಣಗಳೇನೇ ಇದ್ದರೂ, ಇವೆಲ್ಲದರ ಮಧ್ಯೆ ನಿತ್ಯಜೀವನ ಸಾಗುತ್ತಿರುತ್ತದೆ. ಈ ಮಾನಸಿಕ ತುಮುಲ ತೊಳಲಾಟಗಳು,
• ನಮ್ಮ ಹಸಿವು ನಿದ್ದೆಗಳನ್ನು ಕೆಡಿಸುವ ಹಂತಕ್ಕೆ ಬಂದರೆ,
• ದೇಹದ ಮೇಲೆ ಇತರ ಪ್ರತಿಕೂಲ ಪರಿಣಾಮ ಉಂಟುಮಾಡತೊಡಗಿದರೆ,
• ಸ್ನೇಹ ಸಂಬಂಧಗಳನ್ನು ಮುರಿಯಲು ಕಾರಣವಾದರೆ,
• ಸುತ್ತಲಿನ ಜನಗಳೊಡನೆ ದಿನ ನಿತ್ಯದ ವ್ಯವಹಾರಕ್ಕೆ ಅಡ್ಡಿಮಾಡತೊಡಗಿದರೆ,
• ಆತ್ಮಹತೆಯ ಅಥವಾ ಇತರ ಹಿಂಸಾಕ್ರಿಯೆಗಳ ಯೋಚನೆ ಪದೇ ಪದೇ ಬರುತ್ತಿದ್ದರೆ
ನಮಗೆ ಆಪ್ತಸಲಹೆಯ ಅಗತ್ಯವಿದೆ ಎಂದು ತಿಳಿಯಬೇಕು. ಎಲ್ಲ ದೈಹಿಕ ಕಾಯಿಲೆಗಳಿಗೆ ಮನಸ್ಸೇ ಮೂಲವೇನೂ ಅಲ್ಲದಿದ್ದರೂ ಮಾನಸಿಕ ವ್ಯಾಧಿಗಳು ಇರುವ ಕಾಹಿಲೆಗಳ ತೀವ್ರತೆಯನ್ನು ಜಾಸ್ತಿ ಮಾಡಬಹುದು. ಮಾನಸಿಕ ತಳಮಳ ಅಥವಾ ಒತ್ತಡದಿಂದ ಬರುವ ಕಾಯಿಲೆಗಳಿಗೆ ಮನೋದೈಹಿಕ ಖಾಯಿಲೆಗಳು ಎನ್ನುತ್ತಾರೆ. ಇವುಗಳ ಬಗ್ಗೆ ಕುಟುಂಬ ವೈದ್ಯರಲ್ಲಿ ಸಲಹೆ ಪಡೆದು, ಅಗತ್ಯವೆನಿಸಿದಲ್ಲಿ ಕೌನ್ಸೆಲ್ಲರ್‍ಗಳನ್ನು ಭೇಟಿಮಾಡಬಹುದು.
ಖರ್ಚು, ಅವಧಿ
ಕೌನ್ಸೆಲ್ಲರ್‍ಗಳಿಗೆ ಕೊಡಬೇಕಾದ ಫೀಸು ಸಾಮಾನ್ಯವಾಗಿ ಭೇಟಿಗೆ ಇಂತಿಷ್ಟು ಎಂದಿರುತ್ತದೆ. ಇದರ ಬಗ್ಗೆ ಮತ್ತು ನಮಗೆ ಬೇಕಾದ ಇತರ ವಿವರಗಳನ್ನು ಪ್ರಥಮ ಭೇಟಿಯಲ್ಲೇ ಪಡೆದುಕೊಳ್ಳಬೇಕು. ಭೇಟಿಯ ಅವಧಿ ವಾರಕ್ಕೊಮ್ಮೆ ಸುಮಾರು ಒಂದು ಗಂಟೆಯಷ್ಟಿರುತ್ತದೆ. ಪೂರ್ಣ ಚಿಕಿತ್ಸೆಯ ಸಮಯವನ್ನು ನಿಖರವಾಗಿ ಹೇಳಲಾಗದಿದ್ದರೂ ಇದರ ಅಂದಾಜನ್ನು ಪ್ರಥಮ ಭೇಟಿಯಲ್ಲಿ ಪಡೆದುಕೊಳ್ಳಬಹುದು. ನಾವು ಹಂಚಿಕೊಂಡ ವೈಯುಕ್ತಿಕ ವಿಷಯಗಳನ್ನು ನಮ್ಮ ಒಪ್ಪಿಗೆ ಇಲ್ಲದೆ ಕೌನ್ಸೆಲ್ಲರ್‍ಗಳು ಇತರರಿಗೆ ತಿಳಿಸುವಂತಿಲ್ಲ. ಇದರ ಬಗ್ಗೆಯೂ ಅವರಿಂದ ಆಶ್ವಾಸನೆ ಪಡೆದುಕೊಳ್ಳಬಹುದು.
ಕೊನೆಯ ಮಾತು
ಮಾನಸಿಕ ತೊಂದರೆಗಳು ಜೀವಕ್ಕೆ ಅಪಾಯಕಾರಿಯಲ್ಲದಿದ್ದರೂ, ದಿನನಿತ್ಯದ ಬದುಕನ್ನು ಅಸಹನೀಯವಾಗಿಸುತ್ತದೆ. ಸರಿಯಾದ ಸಮಯದಲ್ಲಿ ಸರಿಯಾದ ತಜ್ಞರಿಂದ ಪಡೆದ ಆಪ್ತಸಲಹೆ ಜೀವನಕ್ಕೆ ಹೊಸ ದಿಕ್ಕು, ಆಯಾಮಗಳನ್ನು ನೀಡಬಲ್ಲದು. ಹಾಗಾಗಿ ಈ ಬಗ್ಗೆ ಹಿಂಜರಿಕೆ ಇಟ್ಟುಕೊಳ್ಳಬೇಕಾಗಿಲ್ಲ.
ವಸಂತ್ ನಡಹಳ್ಳಿ